सुशासन कायम गर्न जनमत पार्टीको पक्षमा मतदान गर्न उम्मेदवार गोपालप्रसाद साहको अपिल

भ्रष्टाचार मुक्त देश र सुशासन कायम गर्नकालागि धनुषा ३को प्रतिनिधिसभाका उम्मेदवार गोपालप्रसाद साहले जनमत पार्टीको पक्षमा मतदान गर्न आग्रह गरेका छन् ।

जनमत पार्टीका प्रतिनिधिसभा सदस्य पदका उम्मेदवार गोपाल प्रसाद साहले धनुषा ३को नगराइन्, धनौजी, घोडघास लगायतको स्थानमा घरदैलोकालागि पुगेर सुशासन कायम गर्नकालागि आफ्नो र जनमत पार्टीका पक्षमा मतदान गर्नकालागि मतदाताहरु समक्ष अपिल गरेका हुन् ।

उनले मधेस आन्दोलनबाट प्राप्त उपलब्धि रक्षा गर्न सक्ने क्षमता पनि जनमत पार्टीमै रहेकाले जनमत पार्टीको पक्षमा मतदान गर्नु आवश्यक रहेको बताए । सयौं शहीदको बलिदानबाट प्राप्त संघीयता, समावेशिता र मधेसको स्वाभिमान जोगाउन जनमत पार्टीको जित अनिवार्य रहेको दावी समेत गरे ।

उनले संघीयता तथा मधेस विरोधी शक्तिहरूलाई परास्त गर्दै मधेस र मधेसी समुदायको समग्र उत्थानका लागि सबैलाई एकजुट हुन आह्वान गरे । ‘देश र मधेसको निकासको स्पष्ट दृष्टिकोण जनमत पार्टी र डा. सिके राउतसँग मात्र छ,’ उम्मेदवार साहले भने, ‘त्यसैले हर्न छापमा मतदान गरी जनमत पार्टीलाई बलियो बनाउनुपर्छ ।’

घरदैलोको क्रममा उम्मेदवार साहसंगै जनमत पार्टीका विभिन्न नेता तथा कार्यकर्ताहरूको समेत उपस्थिति रहेको थियो । घरदैलो अभियानमार्फत स्थानीय मतदातासँग प्रत्यक्ष संवाद गर्दै उम्मेदवार साहले मधेसको अधिकार, पहिचान र विकासका लागि जनमत पार्टी निर्णायक शक्ति बन्ने विश्वास व्यक्त गरे ।