विकासको निरन्तरताका लागि मतदातासंग मागिन जुलीले साथ

धनुषा निर्वाचन क्षेत्र नम्बर–३ मा चुनावी सरगर्मी तीव्र बन्दै जाँदा नेकपा एमालेकी उम्मेदवार जुलीकुमारी महतोले परिवर्तनको नारा दिनेहरूप्रति कडा टिप्पणी गर्दै विकासको निरन्तरताका लागि मतदाताको साथ मागेकी छन् ।

धनौजी गाउँपालिकामा घरदैलोकालागि पुगेकी महतोले नयाँ–पुरानोको नारा दिएर मतदाता भ्रमित पार्ने प्रयास भइरहेको आरोप लगाइन् । उनले ‘सांसद बन्नकै लागि परिवर्तनको झुठा नारा दिइँदैछ, पहिले पनि सांसद भइसकेका व्यक्तिले नयाँको नारा दिनु जनतालाई बरगलाउनु हो’ भन्दै अप्रत्यक्ष रूपमा प्रतिस्पर्धी उम्मेदवारप्रति संकेत गरिन् ।

उनले यहाँका मतदाता नेकपा एमालेको ‘सुखी नेपाली, समृद्ध नेपाल’ अभियानप्रति विश्वस्त रहेको दाबी गर्दै व्यवस्था परिवर्तनभन्दा विकासकालागि आवजा उठाउनु आवश्यक रहेको बताइन् ।

घरदैलो अभियानका क्रममा उनले मतदाताका समस्या, गुनासा र सुझाव सुन्दै समाधानका लागि हरसम्भव प्रयास गर्ने प्रतिबद्धता व्यक्त गरिन् । कतिपय विकास योजनाहरू कार्यकाल पूरा नहुँदै निर्वाचनमा जानुपरेकाले अधुरा रहेको उनले उल्लेख गरिन् । ती योजनाहरूलाई पूर्णता दिन पुनः अवसर दिनुपर्नेमा उनले जोड दिइन् ।

महतोले जनकपुरधामलाई धार्मिक तथा पर्यटकीय गन्तव्यका रूपमा विकास गर्न आफ्नो विशेष पहल रहेको दाबी गरिन् । नयाँ राजनीतिक दलहरूले स्पष्ट नीति र दृष्टिकोणविना पुराना दलप्रति वितृष्णा फैलाउने प्रयास गरिरहेको आरोप लगाउँदै उनले एमाले संविधान रक्षा, राष्ट्रिय स्वाधीनता र विकासको एजेण्डामा अडिग रहेको दाबी गरिन् । मधेसको विकासका लागि एमाले नेतृत्वकै सरकारले महत्वपूर्ण योजनाहरू अघि बढाएको स्मरण गराउँदै उनले धनुषा–३ को समग्र विकासका लागि सुरु गरिएका अधुरा काम पूरा गर्न आफू प्रतिबद्ध रहेको दोहो¥याइन् ।