Century Times
भारत, दिल्लीका मुख्यमन्त्री अरविन्द केजरीवालले जमानत पाएका छन्।
केजरीवाललाई दिल्लीको राउज एभिन्यू कोर्टले एक लाख भारू धरौटीमा जमानत दिएको भारतीय सञ्चारमाध्यम टाइम्स अफ इन्डियाले जनाएको छ।
केजरीवाललाई मदिरा बिक्री सम्बन्धी नीतिमा घोटाला गरेको अभियोगमा इडीले गत मार्च २१ तारिखमा पक्राउ गरेको थियो। उनलाई पक्राउ गरी तिहाड जेलमा राखिएको थियो।
हालै सम्पन्न लोक सभा चुनावका निम्ति उनले २१ दिन जमानत पाएका थिए। चुनाव सकिएलगत्तै जुन २ तारिखमा उनी पुनः जेल गएका थिए।
अहिले उनले फेरि जमानत पाएका हुन्। उनी बोलाएका बेला हाजिर हुनुपर्ने र अनुसन्धानमा आवश्यक सहयोग गर्नुपर्ने सर्त अदालतले राखेको छ।
केजरीवालका वकिलले जमानतका लागि दिएको याचिकामा बिहीबार सुनुवाइ थियो।
