Century Times
धनुषा निर्वाचन क्षेत्र नम्बर–३ मा चुनावी प्रचारप्रसार तीव्र बन्दै जाँदा एमालेकी प्रतिनिधिसभा सदस्य पदकी उम्मेदवार जुलीकुमारी महतोले आफ्नो अभियानलाई थप सक्रिय बनाएकी छन् ।
शुक्रबार नगराइन नगरपालिका–४ फुलगामामा घरदैलो कार्यक्रममा सहभागी हुँदै उनले विकास र समृद्धिको स्पष्ट दृष्टिकोण तथा कार्ययोजना एमालेसँग मात्र रहेको दाबी गरिन् । ‘सुखी नेपाली, समृद्ध नेपाल’ नाराले नागरिकको जीवनस्तर उकास्ने दीर्घकालीन लक्ष्य बोकेको उनको भनाइ थियो ।
महतोले मुलुकलाई आर्थिक तथा भौतिक विकासको मार्गमा अघि बढाउन एमाले नेतृत्व आवश्यक रहेको उल्लेख गरिन् । धनुषासहित समग्र मधेश प्रदेशको विकासका लागि पार्टीसँग ठोस तथा व्यवहारिक योजना रहेको उनले बताइन् ।
संविधान निर्माण, लोकतन्त्रको संस्थागत विकास र राष्ट्रिय स्वाभिमानका सवालमा एमालेको भूमिका महत्वपूर्ण रहेको उल्लेख गर्दै उनले राष्ट्रिय हितमा अडिग रहने दल एमाले मात्र भएको जिकिर गरिन् ।
घरदैलो अभियानका क्रममा मतदाताबाट उत्साहजनक प्रतिक्रिया प्राप्त भइरहेको दाबी गर्दै महतोले जनविश्वास नै आफ्नो मुख्य शक्ति भएको प्रतिक्रिया दिइन् ।
