गैरमधेसीलाई ‘मधेसी’ भनी सिफारिस गरेको भन्दै आयोगले काट्यो पत्र

गैरमधेसीलाई मधेसी भनेर सिफारिस गरेको भन्दै मधेसी आयोगले सिरहाको धनगढीमाई नगरपालिकाका नगर प्रमुखलाई सत्यतथ्य र प्रमाणसहित आयोगलाई यथाशीघ्र जानकारी गराउन पत्र पठाएको छ ।

धनगढीमाई नगरपालिका-१३ का स्थायी बासिन्दा ईश्वर अधिकारी गैर-मधेसी मूलको भए पनि मधेसी समुदायको सिफारिस लिएर नेपाल प्रहरी तर्फ निरीक्षक पदमा मधेसी समुदायको आरक्षणमा जागिरको लागि सिफारिस भएको घटना बाहिर आएपछि आयोगको ध्यानाकर्षण भएको थियो ।

आयोगले केही दिन अगाडी सोही घटनालाई लिएर नेपाल प्रहरी र इलाका प्रशासन कार्यालय, लहानलाई कुन आधारमा गैर-मधेसीलाई मधेसी कोटामा नियुक्ति सिफारिस गरिएको सम्बन्धमा आधार खुलाई आयोगलाई लेखी पठाउन भनेको थियो । सो पत्रपछि इलाका प्रशासन कार्यालयले वडाबाट वडा अध्यक्षको हस्ताक्षरित फोटोसहितको सिफारिस आएको आधारमा तत्कालीन समयमा यस कार्यालयले मधेसी प्रमाणित गरेको देखिएको जवाफ आयोगलाई लेखी पठाएको छ ।

सो जवाफ आयोगमा प्राप्त भएपछि आयोगले धनगढीमाई नगरपालिकाका प्रमुखलाई कुन आधारमा गैर-मधेसी लाई वडा अध्यक्षले मधेसी भनी सिफारिस गरेको सम्बन्धमा उचित आधार र प्रमाण सहित यथाशीघ्र  जवाफ पठाउन भनेको छ ।