जनताले चाहेको सबै सपना एमालेले जीत हासिल गरेर पूरा गर्छ : जुली महतो

धनुषा निर्वाचन क्षेत्र नम्बर–३ बाट प्रतिनिधिसभा सदस्य पदकी उम्मेदवार जुलीकुमारी महतोले विकास र समृद्धिको स्पष्ट दृष्टिकोण भएको दल एमाले नै रहेको दाबी गरेकी छन् ।

मंगलबार जनकपुरधाम उपमहानगरपालिका वडा नम्बर–२० स्थित देवपुरा रुपैठामा घरदैलोको क्रममा उनले ‘सुखी नेपाली, समृद्ध नेपाल’ को नारासहित एमालेले प्रत्येक नेपाली नागरिकको जीवनस्तर उकास्ने लक्ष्य लिएको बताइन् । एमालेकै नेतृत्वमा मुलुक समृद्धिको दिशामा अघि बढ्ने उनको दाबी थियो ।

घरदैलोका क्रममा उनले जनकपुरधामसहित समग्र मधेस प्रदेशको विकासका लागि एमालेसँग ठोस योजना रहेको उल्लेख गरिन् । मधेसको विकासका लागि रेलमार्ग विस्तार, जनकपुरधामलाई वैवाहिक गन्तव्यस्थलका रूपमा विकास गर्ने योजना, महेन्द्र राजमार्गलाई चार लेनमा स्तरोन्नति गर्ने परियोजना लगायतका कार्यक्रम एमालेकै पहलमा अघि बढाइएको उनले स्मरण गराइन् ।

उनले शिक्षा, स्वास्थ्य तथा भौतिक पूर्वाधार निर्माणका क्षेत्रमा एमाले नेतृत्वमा विगतको तुलनामा उल्लेखनीय प्रगति भएको दाबी गरिन् ।
नेपालमा संविधान निर्माण र लोकतन्त्रको सुदृढीकरणमा एमालेको भूमिका महत्वपूर्ण रहेको उल्लेख गर्दै उनले राष्ट्रिय स्वाभिमानको सवालमा अडिग रहने दल एमाले मात्र भएको जिकिर गरिन् ।

घरदैलो अभियानका क्रममा आफूले मतदाताबाट न्यानो माया र सकारात्मक प्रतिक्रिया पाएको पनि उनले बताइन् ।