Century Times
भारतीय कम्पनीको एउटा जहाजमा फेरि बम भएको खबरले त्रिभुवन विमानस्थल तनावग्रस्त भएको छ ।
काठमाडौंबाट दिल्ली उड्न लागेको भारतीय वायुसेवा एयर इन्डियाको जहाजमा अज्ञात समूहले बम राखेको सूचना दिए अहिले सर्च अभियान चलाइएको छ । सुरक्षाकर्मीले जहाजमा चढिसकेका यात्रुलाई झारेर चेकजाँच गरिरहेका छन् ।
एआई २१६ उडान नम्बरको यो जहाजबाट दिल्ली जाने ५५ नेपालीसहित १५८ यात्रु थिए । बम भएको सूचनापछि सुरक्षाकर्मीले यात्रुलाई अलग्गै राखेर जाँच गर्दैछन् ।
बमको हल्लाले उक्त जहाज नजिकै रहेको हिमालय एयरलायन्सको अर्को जहाजलाई पार्किङबाट हटाइएको छ ।
यो जहाज सोमबार दिउँसो साढे २ बजे त्रिभुवन विमानस्थलमा अवतरण भएको थियो । अहिले नेपाल प्रहरी, नेपाली सेनाले सुरक्षा जाँच गरिरहेका छन् ।
जहाजमा बम रहेको सूचनासहितको विवरण दिल्लीस्थित एयर इन्डियाकै कार्यालयबाट आएको हो । यसअघि पनि भारतीय जहाजमा बम रहेको खबरले नेपालमासमेत उडान प्रभावित भएका थिए ।
