जनताको माया र सद्भाव हेर्दा रास्वपा सबै भन्दा ठूलो पार्टी बन्नेमा कुनै सन्देह छैन : मनिष झा

धनुषा–३ को चुनावी प्रतिस्पर्धा चर्किंदै गईरहेको समयमा रास्वपाका उम्मेदवार मनिष झाले घरदैलोसंगै पार्टी प्रवेश कार्यक्रमलाई तीव्रता दिएका छन् । जनकपुरधाम–५ तथा ७मा राष्ट्रिय स्वतन्त्र पार्टीका उम्मेदवार झाले घरदैलो अभियानमार्फत मतदातासँग प्रत्यक्ष संवादलाई प्राथमिकता दिएका छन् ।

राष्ट्रिय स्वतन्त्र पार्टी (रास्वपा) का उम्मेदवार झाले सोमबार विभिन्न वडामा पुगेर स्थानीयसँग भेटघाट तथा अन्तरक्रिया गरेका हुन् । उनले विकास, सुशासन र पारदर्शितालाई आफ्नो मुख्य चुनावी एजेण्डा बनाएको बताए ।

झाले शिक्षा, स्वास्थ्य, रोजगारी र आधारभूत पूर्वाधारका समस्यालाई प्राथमिकताका साथ समाधान गर्ने प्रतिबद्धता व्यक्त गर्दै पुरानै शैलीको राजनीतिले जनअपेक्षा पूरा गर्न नसकेको टिप्पणी गरे ।

उनले युवालाई स्वदेशमै रोजगारीका अवसर सिर्जना गर्ने, कृषि तथा साना व्यवसाय प्रवद्र्धन गर्ने र भ्रष्टाचार नियन्त्रणका लागि कडा नीतिगत पहल गर्ने प्रतिबद्धता जनाए । परिवर्तनको एजेण्डा व्यवहारमै कार्यान्वयन गरिने उनको भनाइ थियो ।

कार्यक्रमका क्रममा स्थानीय बासिन्दाले खानेपानीको समस्या, सडक स्तरोन्नति, फोहोर व्यवस्थापन तथा स्वास्थ्य सेवामा सहज पहुँचको विषय उठाएका थिए । झाले ती मुद्दालाई योजनाबद्ध ढंगले सम्बोधन गर्ने आश्वासन दिए ।

सोमबार जनकपुरधाम उपमहानगरपालिका वडा नम्बर २०स्थित नीम चोकमा पार्टी प्रवेश कार्यक्रम समेत सम्पन्न भएको छ । सो पार्टी प्रवेश कार्यक्रममा विभिन्न पार्टी परित्याग गरी १ सय ५० बढी नेता तथा कार्यकर्ताहरु रास्वपामा प्रवेश गरेका छन् । नवप्रवेशीहरुलाई उम्मेदवार झाले पार्टीमा स्वागत गरेका थिए ।