Century Times
धनुषा निर्वाचन क्षेत्र नम्बर–३ मा चुनावी गतिविधि तीव्र बन्दै जाँदा राष्ट्रिय स्वतन्त्र पार्टी (रास्वपा)का उम्मेदवार मनिष झा घरदैलो अभियानमार्फत मतदातासँग प्रत्यक्ष संवादमा व्यस्त छन् । झाको घरदैलो अभियान संगै मतदाताहरुसंगको प्रत्यक्ष सम्वादका कारण रास्वपाप्रतिको आकर्षण धनुषा ३मा बढ्दै गईरहेको छ । शुक्रबार मात्रै विभिन्न कार्यक्रममा गरी ८० जनाभन्दा बढी रास्वपामा प्रवेश गरेका थिए ।
घरदैलो तथा पार्टी प्रवेश कार्यक्रमहरुमा झाले यस क्षेत्रलाई राजनीतिक परिवर्तनको ऐतिहासिक केन्द्रका रूपमा चित्रण गर्दै आगामी चरणको अभियानमा पनि जनताको साथ रहने विश्वास व्यक्त गरेका छन् ।
धनौजीमा आयोजित घरदैलो कार्यक्रममा बोल्दै झाले भने, ‘अबको राजनीति पद र पैसाको खेल होइन, विचार र नयाँ पुस्ताको नेतृत्वमा आधारित हुनुपर्छ ।’ स्थानीय बासिन्दाले उठाएका जीर्ण सडक, बेरोजगारी र युवापलायनका विषयलाई आफूले प्राथमिकताका साथ उठाउने उनले बताए । सुशासन, पारदर्शिता र परिणाममुखी कामलाई मुख्य एजेण्डा बनाइने उल्लेख गर्दै उनले युवालाई स्वदेशमै अवसर सिर्जना गर्ने वातावरण तयार गरिने प्रतिबद्धता जनाए ।
‘राजनीति पेशा होइन, सेवा हो । प्रणाली सुधारबिना विकासले गति लिन सक्दैन,” उनले भने ।
झाले शिक्षा र स्वास्थ्य क्षेत्रलाई पनि आफ्नो प्राथमिकतामा राखेको जनाउँदै सामुदायिक विद्यालयको गुणस्तर सुधार, सीपमूलक तालिम विस्तार तथा सर्वसुलभ स्वास्थ्य सेवाका लागि संसदमा सशक्त आवाज उठाउने बताए ।
भेटघाटका क्रममा केही स्थानीयले विगतका प्रतिनिधिहरूले गरेका वाचा पूरा नभएको गुनासो गरे । त्यसप्रति प्रतिक्रिया दिँदै झाले अब जनताले भाषणभन्दा कामको परिणाम खोजिरहेको बताए । रास्वपाले घरदैलो अभियानलाई धनुषा–३ का अन्य वडामा समेत निरन्तरता दिने जनाएको छ ।
